政情：陳馮富珍被轟削世衞影響力
喺香港沙士一疫備受批評嘅前衞生署署長陳馮富珍，出任世界衞生組織總幹事已經差唔多十年，佢將會喺下年六月底卸任，世衞亦公布咗下任總幹事候選人名單。有外國醫學期刊就發表文章，批評陳馮富珍在任期間，世衞嘅影響力不斷下降，喺伊波拉疫情上更加係反應遲鈍咁話。
少關注經濟對醫療影響捱批
《英國醫學期刊》指，陳馮富珍在任時冇積極關注各國經濟對全球醫療健康嘅影響，世衞近年喺籌募醫學研究資金上亦漸漸畀其他組織追上，令影響力不斷下降。不過陳馮富珍就話唔同意部分批評，仲話喺伊波拉疫情上，所有人都可以做得更好喎！
世衞下任總幹事有六位候選人，分別來自埃塞俄比亞、意大利、法國、英國、巴基斯坦同匈牙利。六位候選人將出席十一月舉行嘅論壇，世衞會先選出其中三人參加下年五月舉行嘅世界衞生大會，到時再投票選出新一任總幹事。