政情：謝偉俊數梁君彥句句有骨
新一屆立法會將於下月開鑼，而現任內務委員會主席梁君彥更一直被視為接任立法會主席嘅大熱人選，奈何非建制派對他相當有保留，民主黨資深議員涂謹申更曾建議改由直選議員謝偉俊出任主席，促使謝偉俊加入主席爭奪戰。大戰臨近，主角之一嘅謝偉俊尋日接受訪問時就大數梁君彥，句句有骨落地，睇嚟建制內訌已進入白熱化階段。
踩無直選洗禮 少歷謙卑
謝偉俊話已知有建制派議員有意競逐主席，但仍無阻佢考慮加入戰團，仲話雖然唔少建制派議員都認為，由曾經出任內會主席嘅議員擔任立法會主席較為理所當然，但希望畀大家選擇，有「新人事新作風」。
佢形容，立法會主席係「交通指揮員」，而非「權威無上嘅獨裁者」，需要謙卑協助處理議會事務。循九龍東直選成功連任嘅佢，繼續發功大彈功能界別出身、多次自動當選嘅梁君彥冇受過直選洗禮，擔心會較少經歷謙卑。咁樣凸顯直選嘅優勢，好明顯係為自己拉票啦！
狠批主持會議作風強硬
不過，謝偉俊都認同梁君彥好有資歷，但就指梁君彥過往主持會議作風比較強硬，甚至出現「一言堂」，所以令到部分議員非常反感。佢仲強調，主席應該要有耐性、作風包容，令議事文化能夠維持優質嘅民主制度。謝偉俊呢招明讚暗踩對方兼借勢讚自己，認真出神入化。
梁君彥嘅黨友、工程界盧偉國就繼續力撐，認為梁君彥過往曾擔任立法會代主席，所以具備足夠資歷及經驗。至於民建聯就表明無意派人參選立法會主席，起碼唔會令呢場爭奪戰亂上加亂。
建制派出現罕見嘅內訌，而泛民主派方面亦蠢蠢欲動，莫非想趁鷸蚌相爭，派人角逐立法會主席？民主黨胡志偉解釋，不論輸贏都希望主席選舉有競爭，所以所有泛民候任議員將會聚首，討論派人出選大會、財務委員會及內會主席，仲話希望主席候選人能夠提出處理議會爭議的政綱添！睇嚟泛民都係本着輸硬嘅心態落場，等建制派內部唔可以咁舒服圍威喂選主席。