中環出更：飯局唔知對方背景 羅范真「純情」
橫洲風波引起社會關注，政府「摸底」手法亦被外界批評及質疑。行政會議成員羅范椒芬就話，政府推出政策前向地區人士進行非正式諮詢係行之有效嘅方法，唔存在枱底交易情況。咁一二年特首選舉期間，佢為現任特首梁振英（CY）助選時爆出流浮山「小桃園飯局」風波，係咪同屬「摸底」？佢就辯駁話，當時係向鄉事派解釋CY參選政綱，唔知出席人士詳細背景，並非利益交換。唔知對方背景都坐埋食飯，真係咁純情？
指摸底後諮詢行之有效
羅范椒芬尋日出席一個活動時話，政府就橫洲發展嘅摸底對象都係鄉郊地區有地位及代表性人物，之後亦有就發展作公眾諮詢，呢種作法行之有效。佢話，依家喺棕地上營運嘅行業都關乎經濟發展，的確要整體研究點樣處理，當中存在一定困難，並非託辭推卸。
一二年二月特首選舉期間，作為CY競選辦成員嘅羅范等人同鄉事選委喺流浮山小桃園海鮮酒家舉行飯局，期間有江湖人物出現，被形容係「黑金政治」。羅范尋日就強調，當時只係解釋CY政綱。