中環出更：愛寵易得 好獸醫難求
養寵物為主人帶來唔少歡樂，但當寵物生病時，主人分分鐘寢食難安。香港城市大學早前舉行晚宴慶祝香港動物醫學教育有新發展，講起養寵物，城大校董會主席胡曉明（Herman）話，自細已經有養狗，依家亦養咗兩隻金毛尋回犬。佢話，養狗帶來好多歡樂，但面對生離死別時就會非常傷心，諗起家中兩隻年邁狗狗只能陪佢多幾年，都有啲傷感添！
Herman話，香港有唔少獸醫，但好嘅獸醫就難預約。動物唔識用言語表達不適，所以搵一個好獸醫好重要，仲要依靠佢哋嘅專業知識搵出病因。
盧偉國護鯉有心得
富豪集團太子女羅寶文（Poman）亦係愛犬之人，家中養有十幾隻狗。佢認同喺香港難搵到好獸醫，所以十分支持培育本土人才。Poman話，依家獸醫唔單止以西醫理論治療，亦有獸醫用草本甚至針灸作治療，佢個人就傾向用中西合璧嘅方法。唔知餵寵物食藥難唔難呢？經驗豐富嘅羅寶文就話唔難，因為寵物知道主人係為佢哋好喎！
立法會議員盧偉國就養錦鯉當寵物，有啲由細養到超過十歲添！佢話錦鯉都會感冒，所以要留意魚鱗狀況及佢哋嘅活躍程度，只要有好水質，錦鯉好大機會能夠自然痊愈，否則就要分池再落藥喇！
雖然寵物咁得人鍾意，但係賽馬會慈善及社區事務執行總監張亮就唔畀兩個小朋友養寵物。佢解釋，未生小朋友前試過養寵物，但佢同太太都感到吃力，小朋友養寵物咪一樣係父母負責照顧，所以都係咪搞喇！