功夫茶最睇唔慣政府無能同埋種種社會亂象，正如眼中容唔下沙子，所以時時拍案而起，針砭時弊，怒斥庸官劣吏。其實功夫茶都唔係一味批評嘅，事關社會上有壞人自然有好人，政府亦唔係個個部門都咁廢，好似入境處咁吖，唔止蟬聯「全球最佳機場出入境服務」大獎，轄下嘅「協助在外香港居民小組」睇得又打得，幫到好多市民，認真抵讚o架。
嗱，香港人鍾意旅行就出晒名，但天有不測之風雲，意外嘅嘢真係講唔埋。好似日本三一一大地震、泰國四面佛恐襲，以至德國火車斬人案咁，都不幸有港人嘅身影。喺受害者及家屬徬徨無助嘅時候，如果有人能夠陪伴在側提供協助，個心都會定好多，而協助在外香港居民小組正正就係發揮呢種急民所急精神嘅特別隊伍嘞。
聽吓曾經遠赴曼谷跟進四面佛恐襲案嘅入境事務主任點講吖。佢話喎，當日最大挑戰係要確定港人死者遺體及傷者位置，事關大量死傷者同一時間送進唔同醫院，場面混亂，加上要說服當地醫院畀遲一晚抵埗嘅死者家屬認屍，真係少啲心力都搞唔掂，好彩得到中國大使館協調，而且上司交代過「任何個案都要當係自己屋企人」，最終不辱使命，完成任務，就算連續兩日不眠不休都抵番晒，呢啲咪叫將心比心囉。
又例如最近發生嘅蘇梅港人情侶自駕遊一死一傷車禍咁吖，入境處再次發揮為人民服務嘅精神，好似家屬因為冇旅遊證件無法前赴當地，入境處特事特辦，第二日已幫家屬辦妥護照，最終男死者魂歸故里，女傷者亦能回港就醫。冇錯，呢啲都係分內事，但有冇攞個心出嚟做嘢，結果大不同。入境處急民所急，想民所想，態度親切，工作專業，市民嘅眼睛係雪亮嘅。
唔講唔知，入境處要處理嘅事千頭萬緒，單係協助在外香港居民小組今年首八個月已接獲近二千宗求助個案，比去年同期增加一成，而「1868」求助熱線嘅通話次數更超過十萬次，精神少啲都唔得掂。仲有呀，近年假難民問題愈演愈烈，入境處一直盡忠職守，既修訂條例加大對蛇頭懲罰力度，又頻頻出訪尋求合作打擊人蛇偷渡。所以話啫，入境處點止機場出入境服務冧把溫咁簡單，直情係全港最佳政府部門喇。
正所謂，是其是，非其非。港府部門做得差固然抵鬧，做得好一樣要讚，對於克盡己責嘅入境處咯喎，功夫茶當然要豎起拇指畀個Like啦。如果其他部門都可以向入境處學習，個個攞個心出嚟做嘢，市民條氣順啲，咪天下太平囉。