政情：公民講場：摸底「失憶」鄺神死撐

元朗橫洲發展爭議愈炒愈熱，運輸及房屋局局長張炳良前日表明有搵過民主黨候任立法會議員鄺俊宇（鄺神）及元朗區議員黃偉賢「摸底」，鄺神立即出聲明否認，點知就被踢爆講大話，其實佢一早知道橫洲興建一萬七千個單位。鄺神尋日再開記者會死撐，承認曾經同多名房屋署和民政事務處職員見面，但就記唔清楚係咩人，又話官員只係向佢提過興建四千個單位喎。記得鄺神有本書《有一種幸福叫忘記》，唔知鄺神係咪因為有四十九萬票支持，覺得太幸福，於是將成個橫洲發展計劃忘記咗呢？不過，又學鄺神話齋，「我們很想抹掉某些回憶，卻發現，回憶是愈想抹，愈更清晰」。所以話呢，「摸底」都有咁多證據留低，如果正式諮詢，班泛民實玩死自己。