政情：八網難逃：黃傑龍考牌一take過揚帆出海
「窮富翁」叙福樓集團執董黃傑龍（Simon）尋日喺社交網站留言，好高興咁話喺遊樂船隻操作人二級考試中合格，而且仲係高分一take過，但佢就唔係諗住開遊艇，而係開帆船出海。原來Simon七年前開始玩帆船，有上過帆船嘅一級同二級課程， 但每一次都需要有船牌嘅人喺隔籬，唔可以獨立開船，所以就決定考番個牌喇。
Simon笑言好耐冇考過試，今次真係下咗五十個鐘頭嘅苦功去溫書。講到現時考船牌只須考完筆試就可以開船出海，會否擔心容易發生意外？Simon就話過往發生撞船意外中嘅駕駛者都有一定經驗，所以問題並非出喺考試上。雖然佢考到牌，但頭一年都會搵個有船牌嘅朋友傍住出海。
泊位技巧最難掌握
作為新牌仔嘅Simon，覺得開船最困難係泊位，因為只要風向睇得唔準，或者速度唔啱，好容易就會漂咗去好遠或者撞花其他船隻。佢上個月已經同幾個朋友夾份買咗隻帆船，大概二十呎長，睇嚟好快可以過手癮喇。