政情：立會長人戰林卓廷險勝
漁農界立法會議員何俊賢身高出眾，過去四年喺立法會內鶴立雞群，更贏得「高佬賢」外號。不過，另一長人林卓廷（阿廷）即將進身議事堂，究竟邊個高啲呢？答案係由阿廷險勝半吋（約2.5cm）。外國研究指香港男士平均身高一米七三，高佬賢身高有六呎三吋半，即約一米九，比較平均值已經超晒班。點知一山還有一山高，阿廷身高有六呎四吋，即約一米九二，剛好險勝高佬賢半吋，成功搶奪最高議員殊榮。
高何俊賢半吋
講到身高，阿廷笑言兒子繼承咗佢嘅特點，年僅十一歲身高已超過一點七米，又話囝囝目前喺籃球隊受訓，深信佢日後身高可去到兩米。曾任廉署調查主任嘅阿廷話，畢業後已經冇空餘時間打籃球，僅曾經加入廉署籃球隊挑戰其他紀律部隊，但往往輸多贏少。佢承認，有高空優勢反而疏於練習，例如搶籃板時輕輕一跳就輕易搶到，久而久之跳躍力不進反退，結果跳得唔高未能夠入樽。
