政情：「廸」提特權法查橫洲建制內鬼恐夠票倒戈
元朗橫洲公屋發展爭議擾攘逾兩星期，質疑「官商鄉黑」勾結嘅候任立法會議員朱凱廸對政府前日解畫唔收貨，堅持喺下月立法會復會後提出引用《立法會（權力及特權）條例》（特權法）調查事件，能否成功關鍵在於功能界別要取得建制派至少七票倒戈支持。有政界人士分析指，隨住特首選舉臨近，唔排除部分建制派會倒戈支持通過特權法，情況猶如一二年喺自由黨及「唐營」石禮謙等人贊成下，成功引用特權法調查西九比賽評審風波。
特首梁振英前日率領官員就橫洲發展爭議解畫，朱凱廸不滿政府只交代部分資料，所以仍傾向喺立法會提出特權法調查事件。包括朱凱廸在內嘅二十九名非建制派候任議員，早前已聯署要求政府詳盡披露橫洲發展資料，料對提出引用特權法意見一致。至於未有聯署嘅熱血公民鄭松泰，相信亦唔會反對。若要引用特權法，必須喺分組點票下，即同時喺直選議席同功能界別中獲過半數贊成。
過去泛民多次提出引用特權法失敗，都係敗於功能界別點票上。不過，新一屆立法會中，非建制派喺超級議席保住三席，加上喺醫學界和建築、測量、都市規劃及園境界搶灘成功，在功能界別總共三十五席中取得十一席。換言之，要喺功能界別取得過半數，需要建制派有七人倒戈。而橫洲事件中，除咗民建聯外，多個建制黨派均未有一口拒絕引用特權法。有政界中人分析指，特首選舉臨近，建制派各懷鬼胎，隨時倒戈支持引用特權法調查橫洲事件。
自由黨稱未作決定
按目前形勢，喺剛過去嘅立法會選舉中大打「反梁」牌嘅自由黨四席全屬功能界別，最有機會「叛變」。自由黨主席鍾國斌回覆本報查詢時亦承認，仍未決定是否引用特權法調查橫洲爭議。剩低嘅三票，則有機會來自經民聯，該黨喺功能界別中共有六票，但係梁君彥盛傳將接任立法會主席，所以唔會投票；林健鋒則為行政會議成員，唔似公開同政府唱反調；而劉業強為鄉議局主席，難以想像會支持「宿敵」朱凱廸。
冇靈魂政府更加弱
不過，剩低嘅石禮謙、盧偉國及張華峰合共三票去向未明，如果加上自由黨四票，剛好達到通過特權法所需嘅七票。倘若立法會成功引用特權法調查橫洲事件，勢必令冇靈魂政府更加弱勢，官員為求自保，進一步互相踐踏，你死你事，後果不敢想像。