中環出更：中出羊子選舉經費近半為裝身
立法會選舉前夕有六個港獨候選人被取消參選資格，但仍要向選舉事務處申報選舉開支。本來打算出選新界西直選嘅中出羊子，日前就申報用咗五千一百多元開支，近半花費喺化妝同影相之上，另外中出羊子亦透過淘寶買入直幡、選舉衫、袖章等物品，中出羊子一方面話支持香港建國，一方面又用內地淘寶服務，都幾矛盾喎。
據中出羊子提交嘅選舉開支申報，可見佢花錢最多嘅地方係個人開支上，包括以一千元買入化妝服務以及用一千五百元聘用攝影師，睇嚟都好重視外表。
此外，佢亦買入多件特殊道具，包括「勾結外國勢力」鈎、一本「基本大法好」道具、香港國袖章等。
大部分物資靠淘寶
不過，最令人意外嘅係，中出羊子大部分選舉物資，都係透過淘寶買入，運費用咗一百八十元。佢一方面大鬧中國係「強國」，又話要搞港獨，但又用淘寶服務畀生意內地賺錢，做咩啫！
落選航運交通界嘅丘應樺亦已經提交選舉開支申報，佢用咗五萬多元，原來佢選舉時甩轆印錯咗五百本總值四千元嘅小冊子，搞到要全部重印，都幾浪費。至於連任工程界議員嘅盧偉國就大花咗二十一萬元，單係選舉代理人酬金就佔咗八萬七千元。
卓妮