中環出更：廠商會好聲音何偉權大贏家
中華廠商聯合會（廠商會）早前搞咗個「廠商會好聲音」邀請賽決賽，會長李秀恒、香港工業總會主席鄭文聰及香港總商會總裁袁莎妮等商會高層齊齊做評判。袁莎妮笑稱唔識唱歌，但卓妮就見佢成晚好投入，不時同坐喺隔籬嘅另一位評判中華出入口商會副會長孔令文交換意見，似乎頗有心得，唔通袁莎妮係識評唔識唱？
當晚經過一番激戰，結果廠商會會董何偉權成為大贏家，事關佢推薦公司同事伍熾任參賽，結果以一曲《北京北京》奪得個人組冠軍兼捧走全場總冠軍獎盃。咁啱何偉權亦係廠商會第一屆歌唱比賽冠軍，今次同事奪冠，佢梗係加倍開心啦！
鄭文聰家中有齊唱K設備
李秀恒話，呢個比賽原本只係廠商會會員參加，今屆就邀請埋友好商會參與，大家一齊唱歌輕鬆吓，唔使下下開會、講政治咁嚴肅。鄭文聰都好認同，佢話唱歌仲有個好處，就係可以識多啲朋友。佢最鍾意唱Bee Gees嘅歌，屋企仲有齊唱K設備，但做咗工總主席之後忙到氹氹轉，想享受唱歌惟有等落莊喇。
最近「唱K神器」無線咪爆紅，李秀恒就有感而發話，如果多啲人鍾意唱歌，發掘多啲唱得之人，即可帶動市場需求，激發業界研發「唱K神器」之類嘅產品，從而帶動文創產業發展。佢話鋒一轉，慨嘆政府官員唔明白，以為工業仲係好傳統咁死做爛做喎！
卓妮