要數近期曝光率最高嘅政府部門，地政總署認咗第二，肯定冇人敢認第一。可惜吖，曝光率高唔代表係好事，正正因為地政總署疏於執法，姑息養奸，先至搞到日日畀人狂鬧，時常上報紙頭條，呢啲咪就係港府管治無能嘅縮影囉。
嗱，唔講橫洲發展計劃縱容霸地呢筆臭史，淨係講取締舊式工廈違契問題吖，地政總署一樣做到唔湯唔水，甩甩漏漏。係人都知，牛頭角迷你倉奪命大火發生後，當局賊過興兵，成立跨部門小組巡查全港工廈，早前公布二百多幢領有危險品牌照嘅工廈，實牙實齒話如果有涉及公眾人流嘅違契個案，就會成為執管目標，一副殺無赦咁款。實情係點？之唔係得啖笑囉。
本報記者巡查其中一幢位於觀塘儲存危險品嘅工廈，結果唔巡猶自可，一巡嚇一跳。該工廈樓高十二層，每層五個單位，竟然有兩成即係十幾個單位被間成劏房出租，每逢夜闌人靜嘅時候，疑似劏房例必燈火通明，仲不時傳出沖涼聲同埋剁肉餅聲，本報記者仲影到有人沖完涼成身濕透咁返回單位添。地產代理直情打正招牌話有關單位「裝修靚到似住宅」，仲話單位內有獨立廁所同睡床，點睇都唔似冇景轟喇吓嘩？
大家一定會問，連記者都輕易發現單位違契，冇理由地政總署會無知無覺嘅喎？鬼咩，地政官僚淨係識得虛應故事，就算派人巡查都只限於朝九晚五嘅辦公時段，摸門釘就收隊了事，梗係天下太平喇。其實，地政官僚幾人頭豬腦都好，都冇可能諗唔到晚上巡查呢一招，弊在港產官僚最叻做一天和尚撞一天鐘，是是但但，求求其其，一味對工廈劏房隻眼開隻眼閉，唔爆大鑊至奇吖。
講到尾，都市炸彈之所以遍地開花，消防隱患之所以層出不窮，地政總署責無旁貸。你話唔係咩，工廈違規問題存在已久，改做食肆有之，宗教場所有之，娛樂場所有之，甚至連寵物善終服務都有，簡直五花八門，無奇不有，傳媒亦經常報道，點知署方一直闊佬懶理，關人個關。好啦，家陣工廈亂象通晒天，民怨載道，照計當局應該執正嚟做喇，點不知署方巡查一樣馬虎了事，漏網之魚捉完又有，真係唔得佢死。
冇計嘞，上樑不正下樑歪，港府連全港有幾多迷你倉都一味靠估，何況工廈劏房嘅數字？更何況其他違規情況？成個政府由上至下都懶懶閒，地政總署又點會唔有樣學樣吖。所以話啫，官僚靠得住，豬乸會上樹，香港好在有第四權，官僚巡查不力，結果咪畀傳媒頻頻踢爆囉。