豬膽鼻、牛咁眼、鯉魚嘴等大家都聽過，而新一代日本寫真偶像岩崎名美被人稱為「羚羊腳」，究竟係點解呢？原來阿妹雙腳又幼又長又美觀，仲有名美同羚羊一樣充滿活力，可以話係冇時停呀！
日本寫真界新人輩出，雖然小弟對美女嘅記憶力特別好，不過面對咁多優質新人湧現，有時都會覺得大腦中嘅記憶體不勝負荷。之不過，今日為大家介紹嘅呢位寫真美人兒，我同大家都一定要記住，佢就係岩崎名美喇！點解？因為佢實在太正、太有魅力喇！
19歲嘅名美青春可人，氣質清新脫俗，面孔散發出一股令男人精力暴增嘅澎湃陽光能量，而令人精神為之一振嘅仲有一副靚偈，身高5呎7吋，婀娜高挑，一雙40吋修長美腿更加被人稱為羚羊腳，配合水蛇腰及斤両十足嘅上圍，加埋鮮嫩又白淨嘅肌膚，名美嘅吸引力可以話無懈可擊，男人點會唔冧吖！
羚羊嘅特性係鍾意跳到高處，而名美出道以嚟人氣愈彈愈高！話說名美讀緊小學六年級嘅時候，已長得亭亭玉立，有日佢行行吓街被星探發掘做少女模特兒，由於五官生得標致，更成為時尚雜誌《JJ》專屬模特兒以及泳衣代言人。另外，名美有個夾Band嘅爸爸，傳授佢一手打鼓絕技，因而獲邀成為網台節目《西川貴教のイエノミ!!》嘅助理，好等知名音樂人西川貴教訪問嘉賓嘅時候，呢位助理都能夠搭上兩嘴。名美嘅魅力沒法擋，連影視界都搵佢拍電影同電視劇，電影作品包括《今天開始談戀愛》及《閃爍的青春》。
現時名美除咗拍水着寫真，亦係電視台賽車節目《SUPER GT+》嘅主持，佢仲會親自落場做訪問添！好彩嘅係名美落場時着得密實，否則一定令到在場嘅賽車女郎大為失色喇。
簡介：岩崎名美經常喺Twitter透露工作情況，大家想知道佢最近做過乜，拍攝賽車節目《SUPER GT+》嘅時候又訪問過邊位車手，就要Click上去睇睇喇。
網址：https://twitter.com/nami_iwasaki?lang=ja
年齡：19歲
身高：5呎7吋
三圍：33C-23-34
撰文：賢