政情：單車賽無暇備戰胡志偉打天才波
今屆立法會選舉，有候選人用踩單車方式拉票，但其實用呢種方式拉票仲有熱愛單車嘅九龍東議員胡志偉，但佢只係維持咗一段好短時間，事關佢八月初曾經患上重感冒，加上選舉論壇臨近，助選團就勸佢停工休息幾日，變成「瞓喺度」拉票，好彩最後都冇影響到表現及選情。不過，原來志偉準備月底參加單車比賽，但無練過車都得？佢就話只要有正常休息，體力應該會同年輕人差唔多喎。
八月初曾患重感冒
講開踩單車，志偉之前試過踩單車返工，佢話比較鍾意踩九龍東嘅路，上完斜之後，可以踩一陣平路先落斜。相比之下，新界單車徑只係得平路，唔夠暢快。
新一屆立法會有二十六位新丁議員，當中以年輕人為主，唔知志偉會唔會考慮拉大隊去踩單車呢？除咗可以強身健體之外，話唔定仲可以拉近議員之間嘅距離，再話唔定可以喺立法會足球隊以外，增添多一隊立法會單車隊添！