政情：返英敍舊鍾國斌順道品酒
好多議員都喺新一屆立法會開鑼前去外地充電，紡織及製衣界議員鍾國斌（Felix）就去咗英國蘇格蘭參觀當地著名嘅威士忌酒廠，專程去到當然要試下唔同品種嘅威士忌啦，幾杯落肚，好容易醉，Felix就打定底，講明當日冇揸車喎！梗係喇，醉駕好危險o架，安全最重要嘛。
Felix話，依家一般市場賣嘅威士忌，最老年份係三十年，但四十同五十年就好少，六十年更加要拍賣先有。今次佢去嘅酒廠最老威士忌去到六十年，佢就試咗七、八種唔同嘅酒，但就冇試五十年同六十年嘅威士忌喇，事關太貴，五十年嘅威士忌價格逾三十萬元，六十年嘅就超過一百萬元。
其實Felix今次只係順道參觀酒廠，主要目的都係出席舊生晚宴。話說佢喺蘇格蘭羅伯特戈登大學畢業，眨眼間已經三十年，今次主要除返母校睇吓，兼且同舊同學敍舊。佢話同班有三十幾個同學，當晚都有二十個出席，真係好難得，有兩個仲做咗阿爺、阿婆輩，認真犀利。