政情：克勤未夠照長江伴左右
新一屆立法會下月正式開鑼，除咗立法會主席、內務委員會主席等重要職位人選討論得如火如荼之外，原來建制派亦因為「班長」人選議論紛紛。據了解，建制派有意實行「雙班長制」，由民建聯（民記）陳克勤（克勤仔）及商界代表廖長江共同擔任班長，表面上係一人輪任一年，但實際係有人覺得克勤仔未夠資格做班長，要廖長江做「攝政大臣」，以免克勤仔一時甩轆，影響建制派聲譽。
民記信大器晚成力捧
建制派一向依賴「班長」統籌聯絡、指點江山，過去四年一直由建制大黨民記派出葉國謙擔任，不過葉國謙今屆退下火線，建制派需要另覓人選。據了解，一向做開「大佬」嘅民記有意推薦曾經任職特首辦、第三屆連任嘅克勤仔出任「班長」，但就有唔少人覺得，克勤仔未夠江湖地位，難以服眾，要一班「尊貴建制議員」聽佢安排並不容易，以致克勤仔做「班長」一事遲遲未能拍板。
不過，據聞民記唔肯放棄，於是提出由黨主席李慧琼「跟出跟入」，陪同克勤仔出席大大小小嘅會面，以爭取建制內部支持。同時，民記亦接納「雙班長制」建議，同意克勤仔與廖長江共同出任班長，名義上係一人做一年，但實制上係克勤仔一旦甩轆，都有廖長江可以「名正言順」衝出嚟補鑊，講到尾其實就係信唔過克勤仔囉！至於民記點解係都要推薦克勤仔呢？克勤仔做咗兩屆議員都只係四十歲出頭，假以時日必定大器晚成。
泛民讚好 貪陳易話為
雖然建制派對於克勤仔做「班長」彈多過讚，但泛民主派議員就啱啱相反。有泛民議員透露，過去葉國謙係「老油條」城府深，同前泛民會議召集人何秀蘭一見面次次都係火星撞地球，搞到最後咩都傾唔成，相反克勤仔就有傾有講，或者可以改善現時泛民建制關係兩極化情況。換句話講，泛民即係貪克勤仔易話為好蝦啲，相信呢個亦係建制內部嘅憂慮，最終克勤仔能唔能夠得到一眾建制派信任，就要睇佢有幾多斤両喇！