中環出更：政府簡介會立會新丁紛早退
政務司司長林鄭月娥（林鄭）尋日聯同幾位問責局長，邀請立法會新議員出席簡介會，據知於開場後一小時，三名議會新丁、候任議員游蕙禎、梁頌恆及民主黨許智峯就早退，而於約十分鐘後，就輪到區議會（第一）功能界別議員劉國勳離場，游、梁二人離開時稱今次基於涉及民生議題決定出席簡介會，下次會視乎議程內容，再決定係咪出席同類會議喎。
林鄭追工聯會數反被寸
此外，據知林鄭喺發言時，突然主動發炮話要向工聯會追數，對於喺選舉輸咗兩個立法會議席嘅工聯會嚟講，擺明就係挑機落井下石，搞到工聯會新丁何啟明忍唔住寸番林鄭，認真精彩！
消息話，林鄭主動提及要向即將卸任議員嘅王國興追數，話柴灣工廠大廈改建而成嘅華廈邨，入住率唔理想，審計署一定會郁政府，佢到時一定會話係工聯會提出，要工聯會幫手解釋喎！作為黨友嘅何啟明見王國興畀人踩到上心口，發言時就寸爆話，如果林鄭要追數嘅話，佢可以安排王國興同佢互追，又提到地區發展要多啲諮詢，以往政府同區議會都溝通不足。林鄭就只係笑笑，冇直接回應「互追」，只係話會努力做，希望運作暢順啲喎，真係自己攞嚟衰。
何啟明呢句「互追」，其實真係有意思，睇番王國興喺當年要求保育該幢工廈，其後政府就話要增加短期公屋嘅供應，決定將幢工廈改建做公屋，當年喺區議會亦有唔少意見認為唔適合做公屋。
其實最終拍板決定嘅係政府，出事唔自省，竟然諗住賴人，到底啲高官識唔識咩叫承擔呢？
卓妮