中環出更：城大頒院士盧偉國感觸良多
香港城市大學尋日頒授榮譽院士名銜畀六位傑出人士，表揚佢哋對城大及教育發展嘅貢獻。其中獲頒榮譽院士嘅立法會工程界議員盧偉國就對城大好有感情，事關當年城大仲係城市理工學院時，佢就已經喺學院擔任同行業相關嘅顧問，後來仲做埋校董，見證校舍搬去九龍塘之餘，仲睇住學院升格做大學嘅前後四年，可以話一直睇住城大長大，真係感觸良多。
另一位獲頒授榮譽院士嘅安永會計師事務所合夥人周雪鳳亦有一大班家人朋友捧場，原來佢亦係城大校友，尋日幾位當年嘅同學都現身捧場。回想起昔日於旺角校園返學，佢話冇依家九龍塘大學咁多課室，只得幾間common room畀同學休息，難忘一班同學一齊睇電視。
周雪鳳憶同窗攝情信
另外，周雪鳳話以前每個同學都有自己嘅儲物櫃，試過收到其他同學偷偷攝情信入佢儲物櫃內，可以話係好清澀嘅回憶。
獲頒榮銜嘅仲有中華廠商聯合會副會長陳淑玲、金銀業貿易場永遠名譽會長張德熙、奔驊貿易及新新惠比董事陳漢斌、及美國康奈爾大學副校長Michael Kotlikoff。本身係品牌發展局榮譽主席嘅陳淑玲話，大學品牌形象發展都好重要，依家城大就採用咗當年佢哋轄下委員會設計嘅新標誌喇。
卓妮同場仲見到沙田區議員龐愛蘭，佢就帶咗隻公仔去恭賀張德熙，原來佢同張德熙太太已相識多年，佢仲話之後會親手車番一件同張德熙今日件袍一樣嘅換落個公仔度喎！
卓妮