教育局局長吳克儉叫得做「吳得掂」，真係實至名歸架！佢呢頭吹噓自己學富五車，每個月讀三十本書，嗰頭削減學校閱讀津貼，犧牲學生利益，簡直精神分裂，畀人鬧爆有乜出奇吖。
話說教育局由今個學年開始停止向學校發放中英文閱讀津貼，令每間學校失去八千至三萬多元購買圖書，但事前淨係向個別校長組織「摸底」，前線老師被蒙在鼓裏；當局甚至鬼祟到喺一份會計文件備註裏面輕輕帶過，而唔係好似往常咁發出正式通函，結果有校長接受傳媒查詢至知原來閱讀津貼「已經唔存在」。咁就難怪教育團體鬧爆當局決策過程倉促、粗暴、獨斷專行，罔顧學生福祉，做法完全唔能夠接受。
咁吳克儉又點解畫呢？佢老哥話相關津貼計劃已推行近廿年，加上時代同閱讀模式不斷改變，網上閱讀同電子書愈來愈流行，今次係「整合資源」而唔係「削資」，學校仍然可以運用其他津貼推廣閱讀；又話諮詢有改善空間，日後會加強溝通喎。
話明「吳得掂」，梗係官話、套話、廢話連篇，信佢一成都雙目失明喇。至於所謂「整合資源」咯喎，更加就係語言偽術，正如教育界人士話齋，一間學校資源係得咁多，要喺冇津貼嘅情況下繼續鼓勵閱讀，難免要挖東牆補西牆，最終受害嘅都係學生。
係人都知，學好語文最緊要閱講聽寫四樣功夫，閱讀排第一位，而港府亦開口埋口鼓勵閱讀風氣，家陣居然停止資助學校買書，直頭自打嘴巴。冇錯，唔睇實體書可以上網睇電子書，問題係依家啲細路已經一個二個「低頭族」，揦起手機平板電腦，睇睇吓容乜易分心走去捉精靈又或者上社交網站架！話時話，好多先進國家都積極鼓勵閱讀實體書，好似德國咁，街頭巷尾都設有書報亭，實行資源共享，歷任總統甚至親自出任促進閱讀基金會名譽主席，好心港產官僚學吓嘢喇。
正所謂，再窮不能窮教育，教育經費點可以話cut就cut架。再講吖，閱讀津貼花費有限，每間學校減一萬幾千，一年慳得幾多呀？港產官僚出名大花筒，淨係吳克儉遊埠已經耗費幾百萬，少睇一次日本櫻花同制服少女，條數已經好襟計，家陣諗埋晒啲縮數，搵學生開刀，仲有冇再離譜呀！
當局成日話審慎理財，應慳則慳，呢個大原則冇人會反對，不過最應該慳嘅唔係教育經費，而係「吳得掂」呢類廢官嘅人工，慳番嘅錢用嚟津貼學校買書，到時學生哥點止一個月讀三十本，直頭讀書破萬卷添啦！