賽車女郎喺賽車場上，除咗靠迷人身段同性感制服嚟吸引目光外，仲有乜嘢可以喺芸芸女郎之中突圍而出呢？韓國賽車女郎兼模特兒吳哈淥就話畀大家知，憑住一對迷人眼眸就得，佢為咗令一對電眼電力十足，更係做足保養工夫添。
出生於南韓清州市嘅吳哈淥，原名李雅亮，成為賽車女郎之前，已經投身模特兒工作，之但係講到令佢成名嘅地方，卻係喺賽車場上。話說喺2014年任職模特兒嘅佢，獲得汽車品牌邀請客串做賽車女郎，雖然佢演出經驗豐富，但係喺人頭湧湧嘅賽車場上工作還是第一次，因而令佢感到十分緊張。不過佢認為作為一位專業模特兒應該要接受挑戰，於是決心踏出模特兒界，自此以後，各種車展及賽車女郎工作接個不停，此外，佢亦成為電玩女郎，於NCsoft G-STAR電玩展中登場。當然，佢冇忘記到模特兒嘅身份，化身成亮麗嘅時裝模特兒喺雜誌中亮相。雖然工作量相當大，但係佢一啲都唔覺得辛苦，相反更加敬業樂業，好似早前佢喺拍攝寫真期間唔小心扭傷腳，結果佢強忍住痛楚直至完成工作為止，呢種專業態度值得讚賞。
迷人車模有好多，性感模特兒更係有唔少，要喺眾多索模之中突圍而出，靚樣好身材絕對唔少得，不過哈淥認為咁樣仲未夠噃！高挑嘅身材固然係佢嘅賣點，加埋修長美腿，更係相當煞食，不過佢最滿意自己一雙眼睛，皆因電力十足，將人電到暈陀陀。佢表示自己雙眼有種睡態美，即係驟眼望落去好似未瞓醒，但係睇真啲，就會發現佢眼中有對方嘅存在喎！大家明唔明佢講乜呢？唔明唔緊要，簡單講，即係佢希望同大家有眼神交流。問到佢最鍾意着邊類時裝，佢竟然有趣地表示如果比堅尼係時裝嘅話，一定會揀比堅尼，既展現出迷人體態美，又能表現出個人自信，而熱愛游水嘅佢，當然最享受着住比堅尼暢泳無拘無束嘅感覺啦！
簡介：吳哈淥憑住一對電眼迷倒大眾，不過講到最值得欣賞嘅地方，係佢專業嘅工作態度。想了解佢多啲同睇靚相，就要去佢嘅Instagram喇！
網址：https://www.instagram.com/modelohharu/
出生地：南韓清州市
身高：170cm
三圍：32、24、35
撰文：魂