政情：公民講場：只許吳官博覽 不助學生閱讀

自稱可以每月讀三十本書刊、連遊日都去書店買雜誌嘅教育局局長吳克儉（吳得掂）理應支持閱讀，但當局竟然背道而馳，喺今個學年停止向學校發放「中英文廣泛閱讀計劃」津貼，結果惹來批評。吳得掂尋日解釋，近年學生閱讀模式已經改變，流行網上或電子閱讀，所以要整合同理順資源喎。教育界立法會議員葉建源批評，當局寧願豪花十億元在一帶一路獎學金，都唔肯發放閱讀津貼。教協會長馮偉華就批評當局只係向兩個中小學組織「摸底」，其他教師團體同持份者都唔知情，要求當局撤回決定。吳得掂今次真係只許州官睇雜誌，不許學生哥閱讀喇！