新一屆立法會下月開鑼，立法會秘書處已通知班議員首次開會時嘅宣誓次序，喺新界東當選嘅青年新政梁頌恆早前就話過會參考外國方式，以特別手勢、衣着或裝飾表達意見，加上其他本土及泛民候任議員都表明「玩嘢」，成個嚴肅嘅宣誓程序勢必受阻，而排喺呢班人之後宣誓嘅建制派議員，想快啲宣誓了咗件事、紓緩緊張心情都唔得！
立法會議員必須喺首次開會時宣誓擁護《基本法》，排序會根據候任議員嘅議會年資而定，即新任議員會排得較後位置。
排六十一宣誓嘅梁頌恆、排六十三嘅游蕙禎以及其他本土派都表明會以「特別嘅方式」宣誓。梁頌恆話會參考英國或美國議員方式，宣誓同時加入特別手勢、衣着等，或者喺誓詞加入「效忠香港人」宣言，又話到時會有「新猷」，希望做啲無人做過嘅事，到時會唔會因為行為太過火而被阻止，甚至被趕離場，仍然係未知之數，但宣誓過程一定會受影響。
再加上宣誓次序唔係按黨派分類，泛民、本土、建制梅花間竹，如果有建制議員，好似夾喺青政兩人之間嘅工聯會陸頌雄、鄭松泰同劉小麗之間嘅民建聯劉國勳等，因不滿自己嘅宣誓被本土延誤而發難，到時又有好戲上演。