中環出更：張國鈞爆梁美芬拉攏律師議員

新一屆立法會中，擁有律師背景嘅建制派議員數目增加至八人，較泛民主派律師議員多一倍，形成一股新勢力。民建聯候任議員張國鈞尋日同傳媒茶敍時透露，另一擁有法律背景嘅資深議員梁美芬早前已經聯絡有律師背景嘅建制派新議員嘗試合作，互相交流法律意見。咁多新議員，唔知大家會面時，會唔會叫聲梁美芬做「美芬姐」呢？

張國鈞指出，立法會選舉完結後，梁美芬曾相約他及黨友周浩鼎商討過，認為有律師背景的建制派議員可以嘗試合作，但未必需要籌組聯盟，亦未必需要經常定期聚會，各人可以就大議題及較困難的議題，例如喺政制及保安方面交流法律睇法，未來有機會喺一啲議題上，共同表達法律觀點。

至於梁美芬接受查詢時承認，她曾相約數名有律師背景的建制派議員，包括何君堯、張國鈞及周浩鼎食早餐，而自己與新民黨容海恩亦相熟，打算相約見面，希望日後同這幾位有律師背景嘅建制派議員定期會面，未來亦可能會歡迎更多人加入。她認為，大家來自唔同政黨，呢種會面能夠促進跨黨派溝通合作，就唔同議題交流法律意見。

卓妮