中環出更：葉鍾佩雲試用騎呢護膚品
最近零售市道疲弱，各行各業都絞盡腦汁求生，甚至引入大膽產品。卓妮日前喺沙田馬場仁濟盃賽事上見到卓悅控股副主席葉鍾佩雲，佢都話要更加勤力去外國搵新產品，但係有啲產品真係夠晒新奇趣怪，亦嚇親人。咩產品咁新奇呢？好似有人用熊血及小朋友切除嘅包皮用來做護膚品，葉太直言基於道德考慮，無論效果幾正都唔敢引入香港喎！
葉太話，環顧世界各國，要數美國及韓國嘅美容業最大膽。最近佢喺韓國發現熊血係護膚品嘅其中一種成分，美國更加有人抽取小朋友切除嘅包皮細胞做護膚品，聲稱係最年輕嘅細胞喎！咁佢有冇試用？葉太一臉難忘話，梗係試咗，臭到唔識講，因為產品冇落香料。葉太耍手擰頭話唔敢引入，因為挑戰咗道德極限，笑稱驚被人掟雞蛋抗議喎！
朱穎詩宓其琪拍住搞生意
當日仁濟盃賽事，除咗仁濟醫院董事局主席鄭承峰主打外，其哥哥兼仁濟前主席鄭承隆、仁濟副主席王賢訊太太朱穎詩都有入場趁熱鬧。朱穎詩最近亦一腳踏入美容界，拍住內地最大嘅專業建材網站綠城電商執董宓其琪（Kiki），齊齊搞美容產品生意。朱穎詩同Kiki係大埔一個豪宅嘅鄰居，兩人情同姊妹，所以Kiki都同家人入場支持仁濟。
身形愈來愈「健碩」嘅鄭承峰話，自從有連鎖健身中心執笠後，依家已經唔興買健身會所會籍，而係跟住健身教練訂唔同嘅場地周圍走，最近佢就試過搬車胎當健身，笑稱都幾有趣喎！
卓妮