話說戰國時期齊國發生嚴重饑荒，有個叫黔敖嘅貴族喺路邊預備好食物，見有饑民用衣袖遮面，於是大嗌︰「喂，過嚟開飯啦！」點知對方回應，就係因為唔願意接受呢種「嗟來之食」，至會搞成咁。今時今日香港地好多福利制度表面幫助有需要人士，實際上查家宅咁查，擺明刁難人，同嗟來之食唔差得幾遠嘅咋。
好似「低收入在職家庭津貼」咁吖，原意係紓緩冇攞綜援嘅低收入在職家庭經濟負擔，估計有七十萬人受惠，點知推出後反應遠遜預期，至今淨係收到三萬一千多宗申請，當中約二萬宗成功獲批，涉及款項二點五億元咁大把，連勞工及福利局局長張建宗都話感到擔心同困擾，可想而知計劃有幾咁失敗。
咁點解低津申請冇人吼，唔通真係嫌錢腥？鬼咩，官老爺推低津毫無誠意，除咗限制多多阻礙申請意欲，淨係表格已長達八頁，填寫嘅欄目水蛇春咁長，煩都煩死人，好似有人喺茶餐廳打工月入得三千幾元，經社工協助申請，前前後後搞咗兩個幾月，點知最後獲知工時唔合資格；又有人補交四次文件，仍未能成功申請，唔嬲就假；甚至有人因為申請手續太過繁複，搞到夫妻失和嗌晒大交，幾乎離婚收場。你話嘞，申請低津手續咁繁複，條件咁苛刻，與其話係幫人，不如話係趕客，咁搞法反應想唔冷淡都幾難。
冇計喇，班高官薪高糧準，安坐冷氣辦公室不食人間煙火，民間疾苦佢哋知條鐵咩。最好笑嘅係，張局長雖然後知後覺，起碼都叫做知衰，承諾簡化表格以及加強宣傳，難為佢老闆早排仲喺網誌猛吹低津幫到幾多基層市民，當正政績咁大sell特sell，諗住往臉上貼金，結果依家出醜收場，唔衰攞嚟衰。
講開又講，低津門檻高以致反應冷淡，除咗因為官僚閉門造車堅離地，更反映佢哋算死草嘅孤寒財主作風。大家有眼見，當年推長者生活津貼，本身已經係小恩小惠，聊勝於無，當局咁都要加設資產審查，係要等到全城圍插至死死地氣跪低。又如交通津貼，一樣因為限制多多而搞到好多有需要嘅人無法受惠，最終不得不放寬條件。至於全民退保咯喎，明明社會已經討論多年，人人有份係全民共識，港府居然搞出「有經濟需要」及「不分貧富」兩套方案，講到底咪又係縮骨作風。
呢個政府就係咁嘅嘞，明明係算死草，偏偏又要假仁假義，搞埋晒啲小恩小惠又唔湯唔水，結果咪適得其反，搞到怨聲載道囉。港府施政寸步難行，民望趴地，根本就係咎由自取！