政情：公民講場：無能政府惹火 核彈也來襲

候任新界西立法會議員何君堯嘅言論一向都被人話「惹火」，但尋日佢接受電台專訪時就否認自己言論惹火，仲話自己「是其是非其非」，如果話佢嘅言論惹火，咁另一候任議員朱凱廸嘅言論就係「核彈」，仲叫對方說話一定要謹慎喎。何君堯之所以咁講，係因為朱凱廸曾指元朗橫洲發展計劃有「官商鄉黑勾結」，覺得朱凱廸應該攞出證據，講出具體內容，而唔係將事件政治化。其實真正惹火嘅係政府先啱，歸根究柢係政府一直就橫洲發展計劃交代得唔清唔楚，計劃中原定提供嘅一萬三千個單位突然消失，引致爭拗不絕、社會撕裂，相關官員真係要引咎辭職！