《水手服與機關槍-卒業-》、《美少女戰士》及《強襲魔女》呢三套電影同動畫有乜共通之處呢？答案就係水手服！雖然坊間有好多分析同研究，解釋日男鍾情水手服嘅原因，但講嚟講去都係唔明。不過唔緊要，只要知道佢哋其實除咗水手服外，仲有唔少鍾情嘅制服。日本網站「My Navi Woman」喺三年前曾做過調查，研究日男最想女友着乜嘢制服，時至今日呢個排名仍然冇變動。所以話愛呢家嘢，真係可以多年不變o架！
有受訪者表示最想女友着水手服嘅原因，係因為未見過對方讀書時代着水手服嘅樣，亦有人稱十個女仔九個着水手服都好好睇。不過呢啲理由都唔夠坦白，皆因有受訪男士話：「冇辦法，呢個係男人嘅夢想。」究竟係夢想自己重返十幾歲嘅年紀，定係幻想女友只得十幾歲？呢點真係要問佢哋至知喇！
鍾意旗袍嘅原因真係一啲都唔難諗，可以睇到女仔嘅美腿，而貼身嘅剪裁更加展現出迷人身材。呢班受訪者相當認同呢兩個觀點，佢哋覺得高衩裙襬間，若隱若現嘅美腿令佢哋好有遐想。不過，乜旗袍係制服嚟咩？原來日本部分中式餐館當中嘅女侍應以旗袍做制服，有人見到班女侍應着得咁好睇，從此愛上旗袍。
唔明點解會有呢個選擇嘅話，咁就要睇下日本「愛情動作片」，就明白看護服真係好受日男歡迎。根據呢班受訪者表示，看護服令佢哋相當有感覺，亦有人話看護服可以畀到佢安全感，又有人話自細已經鍾意呢種制服。其實，佢哋係咪因為睇得「愛情動作片」太多呀？
水手服同套裝校服係有分別o架！前者係水手服改變成校服，後者則係西式套裝校服，日本人出晒名嚴謹同仔細，呢啲嘢梗係唔可以搞錯。日男愛套裝校服嘅理由好簡單，因為未見過女友着套裝校服，所以充滿好奇，好想佢着，另一更大嘅原因係「讀書時往往只能遠觀着套裝校服嘅女生。」哦！家陣係可以近觀兼可以褻玩？
低胸貼身高衩連身衣、絲襪、高踭鞋同埋兔仔耳，呢個係兔女郎指定造型。源自上世紀60年代開業嘅Playboy Club 女侍應制服，充分展現出女性嘅美態，而受美國文化影響嘅日本，鍾意呢種性感標誌嘅制服亦一啲都唔出奇。不過奇就奇在有受訪者指，覺得呢套制服好萌，着咗喺可愛系女性身上更係萌爆喎。
講到最愛嘅制服，點可以少得女僕服呢！只要喺秋葉原行個圈，見到處都係女僕Cafe，就感受到女僕服對日男係幾咁有魔力。有受訪者話女僕服可以令佢有種尊貴嘅感覺，咁係咪即係可以滿足大男人主義呢？
呢個又係一個尋找回憶嘅故事。由於二戰後，日本教育部門喺中小學課程中加入游泳一項，只係有感當時嘅泳衣唔適合學生着，因此將比賽用泳衣修改一下，變成學園專用泳衣。一件頭冇睇頭？人哋都話為咗Enjoy回憶，咪咁膚淺啦！
日男鍾意睇女仔着水手服，日女又覺得着水手服夠靚，於是大阪品牌BIBI LAB就推出水手服時裝系列，實行將水手服時裝化。不過喺推出女裝水手服之餘，唔明點解會推出男裝水手服，而本嚟諗住半年先至賣得晒，點知開賣2日就賣晒。男裝水手服，段估唔係畀女友着啩？
撰文：魂