乜嘢叫「貼錢買難受」？睇吓民航處親身示範咪知囉。民航處耗費十五億元購下新空管系統，點知新系統甩皮甩骨，問題多多，執漏四年先至好不容易喺下月底全面啟用，正當大家以為從此一天光晒，其實麻煩先至啱啱開始咋。
話說民航處以減輕新系統初期運作負擔為由，喺啟用頭四星期，即下月三十日至十一月二十六日，強制航空公司取消大量航班，結果多達二千五百班航班由有變冇，大批買定機票嘅乘客慘被玩殘，大失預算，唔嬲至奇。
嗱，有單畸士係咁嘅。有市民利用信用卡飛行里數，一早向港龍航空換取一張今年十一月由香港飛沖繩嘅來回機票，丈夫同女兒亦向另一航空公司買定機票，訂定酒店，滿心歡喜諗住一家人共享天倫之樂。殊不知港龍航空上月突然通知，原有航班被取消，必須改乘翌日另一班機，就算乘客唔接受亦唔可以退款，里數最多保留至年底就會取消，擺明大石壓死蟹啫。
港龍話喎，唔係佢哋唔想飛，而係民航處唔畀佢哋飛，所以唔會賠償乘客嘅損失。咁即係點？即係耍賴囉，航班話改就改，仲要唔肯退款，合約精神蕩然無存，簡直離晒大譜。之但係一個巴掌拍唔響，如果唔係民航處有眼無珠大花筒，購入唔湯唔水連印度都彈番轉頭嘅爛空管系統，又點會搞到家陣倒瀉籮蟹、市民怨聲載道喎。
其實講嚟講去，問題咪就係新空管系統嘅安全性成疑囉。今年六月分階段使用嗰陣，民航處已經被踢爆將原定每日運作兩三小時，改為隔日短時間運作，擺明信唔過新系統喇。新系統下月話就話全面使用，結果又搞出減少航班削足適履嘅笑話，叫人點放心吖？香港自詡國際航空樞紐，空管系統關乎航空安全，所有乘客生命都交喺民航處手上，偏偏民航處甩甩漏漏，話唔驚就假咯。
退一步講，就算新系統安全，減少航班對香港嘅損失亦非同小可。有學者計過，減少二千五百班航班，即係減少十五萬訪港旅客，旅遊收益將大減最少七億五千萬元。旅遊業本已陷入寒冬，家陣仲要雪上加霜，民航處簡直靠害。
講到尾，千錯萬錯，最錯就係冇神經政府。如果唔係當局監管不力，任由前民航處處長羅崇文胡作非為，又點會枉費巨資買入呢個未見其利先見其害嘅空管系統吖？如果唔係當局高高舉起輕輕放下，是非纏身嘅羅崇文又點可以拍拍屁股咬長糧，留低咁大個爛攤子要人執手尾吖？點都好，航空安全係重中之重，人命關天，絕對唔講得笑，唔該港府睇緊啲，千祈咪一錯再錯吖！