政情：陳沛然教女 校園喻議會
過往一直有人話學校係社會嘅縮影，但新當選嘅醫學界候任立法會議員陳沛然就將學校當成立法會嘅縮影。話說佢有三個分別三歲、六歲及九歲嘅囡囡，有日被囡囡問到究竟立法會議員做啲乜嘢？點知陳沛然就話議員即係學校嘅「班長」，會監察校長同修改校規喎。唔知佢囡囡聽完之後，會否真係返學爭做班長呢？
陳沛然話，囡囡原本只係問議員係乜嘢，佢只係想用個囡囡較易明嘅比喻，所以就話議員好似班長咁，都係選出嚟嘅。囡囡之後就接住問議員嘅職能，於是佢就靈機一觸，將立法同修改法例比喻成改校規，監察政府同行政長官比作監察校長。點知囡囡就反問佢點解要改校規同如何監察校長，搞到佢頭都大埋，心諗「大鑊」喇，唔知囡囡返到學校會唔會都去選班長，要求改校規，變成「問題學生」呢？
吸取朋友「教訓」唔追仔
作為三女之父，加埋太太，陳沛然笑言屋企「一屋都係女人」。被問到會唔會追番個仔以壯聲勢，佢就話有朋友生咗三個女後，再追咗對孖女，有「崩潰」嘅感覺，所以佢唔想步朋友後塵喇。