政情：越南經商多年 蔡冠深會話水皮
身兼香港越南商會創會會長嘅新華集團主席蔡冠深（Jonathan），其家族三代喺越南做生意超過三十年，生意包括海產、咖啡、房地產等。不過，Jonathan就話自己啲越南話仲係幼稚園水平，就連早前越南總理阮春福來港交流，佢都要戴上即時傳譯耳機，先聽得明對方致詞。
獨愛當地牛肉河粉
Jonathan話，佢第一次接觸越南時，因為唔識越南話，而當地文化又唔同，所以覺得好陌生。不過，經過咁多年往來，都仲係唔識講越南話，只係識聽少少。雖然文化同語言都唔係好適應到，但唯獨飲食方面佢就好易適應到，仲自爆最鍾意食越南最出名嘅牛肉河粉，依家每次返去越南都一定要歎番碗喎！