政情：立會敗將 轉攻選委
立法會選舉戰落幕，有人歡喜有人愁，但人總要向前看，多名落選者已積極搶攻十二月特首選舉委員會分組界別選舉。其中首次出選立法會批發及零售界選舉但落敗嘅民主黨區諾軒，就屢敗屢戰，決定爭做批發及零售界選委；而在商界落選嘅自由黨陳浩濂、旅遊界敗選嘅林少麟、以及喺資訊科技界（IT界）落敗嘅楊全盛，都揚言會積極考慮參與選委戰，期望增添政治影響力。
選委會可以喺特首選舉中左右大局，每次特首選戰前夕，泛民與建制派都喺選委會分組界別選舉你爭我奪。首次出戰立法會批發零售界、以約一千票落敗嘅區諾軒已明言會挑戰選委會批發及零售界選舉，但考慮到如聯同其他人合組名單勝算不大，所以會以個人身份參選，希望立法會選民繼續支持佢，令該界別可以有民主派聲音。佢亦歡迎其他泛民人士出選該界別，以爭取更多席位。
單仲偕仲諗緊名單
白鴿黨除咗區諾軒之外，在立法會選舉中幫人「抬轎」、將卸任議員嘅單仲偕亦有計劃再次出戰IT界，但正考慮名單人數，估計泛民喺立法會IT界選舉中成績不俗，所以會增加名單人數。此外，該黨亦會搶攻中醫、社福、衞生服務、宗教、高等教育界選委。即將卸任議員嘅陳家洛過往亦有參選高等教育界，他指高等教育界是泛民票倉，為踢走現屆政府，應進取及積極參與。
除咗泛民表明搶攻選委，建制派一眾立法會敗選者亦不輸蝕。喺立法會商界（第一）選舉中高票敗選嘅陳浩濂，亦話有興趣參與選委戰，好大機會循商界參選。至於楊全盛與立法會香港島直選落敗嘅王維基料會循IT界參選選委，其中楊全盛話會積極考慮，只係參選名單未確定。
工聯會爭講數籌碼
林少麟亦都話會積極考慮出選旅遊界選委，如參選將會組二至三人名單。至於兩名角逐連任失敗嘅工聯會議員鄧家彪、王國興，如要出戰選委就可選擇循勞工界或區議會界別。鄧家彪就話，不論喺邊個平台參選，工聯會都會盡量爭取席位，準備同特首候選人講數喎。