中環出更：肥尹迷信選舉「贏條毛」
今屆立法會選舉，佔領中環發起人之一嘅戴耀廷大搞「雷動計劃」玩死多名泛民老將，部分人就算當選都贏得好險，當中「生還者」包括參選新界西直選的民主黨（白鴿黨）尹兆堅（肥尹）。肥尹除咗早前狠批戴耀廷「亂咁嚟」外，仲自爆好迷信，指今次選舉大難不死，全靠一條毛喎，究竟佢有條咩毛咁巴閉呢？
區選剃白眉即敗陣
話說肥尹去年參選葵青區議會，選舉日前曾經將一條白色眉毛剃走，點知即刻以五十幾票落敗。自此之後，佢就覺得「寧可信其有」，不敢亂剃眼眉。直到今次立法會選舉，就算有好多人提醒佢有條眉毛變白，佢都力保條毛，以免影響選情。點知又被肥尹講中喎，無脫毛果然成功當選，究竟他係「靠條毛」，抑或靠實力呢？
通常迷信的人都好怕鬼，但肥尹又唔怕喎。他自爆喺立法會大樓嘅撞鬼經驗，話佔領行動期間曾經喺大樓內留宿，瞓瞓吓突然感覺到旁邊有人「跳梳化」將他彈起，但一扎醒咩都見唔到，但佢就繼續當無事瞓到天光。其實肥尹忽然認喺立法會大樓內留宿，算唔算「鬼拍後尾枕」呢？
卓妮