中環出更：金曲校服派對 拾回憶 助學童
唱歌籌款係唔少慈善團體每年都舉辦嘅活動，仁愛堂早前就以「回到校園」為主題舉辦咗個名人名曲慈善演唱會，為不同階層嘅學童服務項目籌募經費。當晚唔少總理都着埋校服現身，重溫學生時代回憶，比起只係唱歌更有睇頭。卓妮就見到總理沈運龍（Aaron）冇着校服，反而一身白色西裝，唔通佢想扮老師？
原來Aaron學生時代係着全白色校服，諗吓都知唔易打理，佢仲自爆細個曾經被班主任抽咗佢同另一位同學出來，當眾鬧佢哋分別係全班校服最乾淨同最污糟嘅示範，而佢就係最多污糟豬嗰個嘞！Aaron解釋，因為細個掛住幫媽咪整胸圍及剪線頭賺外快，唔得閒理套校服夠唔夠白淨，所以咪被老師話囉！
依家Aaron特別鍾意着白色西裝出席公開場合，仲要係白雪雪嗰隻，唔知係咪佢嘅童年陰影？佢太太Alice則於法國長大，冇着校服嘅傳統，但唔可以着拖鞋短褲返學，連名牌都唔得喎！
當晚着校服現身嘅仲有副主席李愛平、陳達華及其太太李玉佩。見李愛平特別帶埋個書包扮學生，相當認真，講起咁多種唔同嘅校服款式包括長衫、水手裝、白色裙及格仔裙等，佢就話最鍾意格仔裙，難怪當晚着格仔裙出場喇。至於李玉佩就透露，年輕時係着白色校服裙加條腰帶，夠晒清純，當晚難得有機會就同丈夫試吓穿另一種款式。
鄧錦雄拉隊坐「校巴」
當晚主席鄧錦雄忙住滿場飛，除咗招呼嘉賓之外，仲同啲董事局成員埋去「校巴」位置影相留念，而主席梗係坐頭位帶領其他成員啦，非常過癮。
卓妮