明月幾時有，把酒問青天。今日係中秋佳節，亦係人月兩團圓嘅好日子，可惜吖，天公不作美，雖然超強颱風莫蘭蒂冇正面吹襲本港，但天色依然麻麻哋，市民抬頭只見烏雲，可能都要問句「明月幾時有」咯。
點都好，中秋係大日子，即使無月可賞，一樣無阻香港人出街玩樂嘅興致，不過玩還玩，千祈咪做缺德鬼吖。冇冤枉o架，每年中秋節過後，各賞月熱點例牌一片狼藉，垃圾成山，而且實有人因為煲蠟而樂極生悲。好似舊年咁吖，至少有兩名市民因為煲蠟受傷需要使用急症室，仲有一名女子差啲燒着間屋添，至於前年更有十一人因為咁而入院，好冇癮啫。
講起煲蠟，的確係唔少人嘅童年回憶，但隨着社會發展同埋文明程度提升，好多人都知道煲蠟係高危玩意，而且污染環境，但偏偏仍然有好多人一於照玩可也，簡直唔知死字點寫。正如醫管局顧問醫生話齋，熱蠟溫度比沸水仲高，可達三級燒傷程度，嚴重者更會影響四肢活動機能甚至毀容，尤其係香港人口密集，賞月地方人逼人背貼背，萬一發生火警，真係好大鑊o者。
嗱，康文署同埋房屋署近日都有呼籲市民切勿「以身試蠟」，房屋署仲講明會派員巡邏，屢勸不改嘅公屋居民隨時會被扣分，兼有機會因為弄污公眾地方而被罰款一千五百大元。所以話啫，點玩都好，最緊要安全，最緊要有公德心，千祈咪將自己嘅快樂建築喺大眾嘅安全之上呀。
當然啦，香港人嘅缺德行為點止煲蠟一味吖，亂拋垃圾同樣令人慘不忍睹。再以舊年為例，淨係維園已經收集超過兩噸垃圾，至於其他賞月熱點就仲得人驚，唔止淪為垃圾崗，仲破壞處處，例如有公園嘅大樹被人掛滿螢光棒，搞到好似大埔林村許願樹咁款；又例如有公園嘅木橋被人燒穿窿，最終要當局花錢維修。大家睇到喇，香港人最鍾意笑內地人唔文明，實情係五十步笑百步咋，香港人嘅質素根本唔好得內地人幾多。
話時話，近年中秋節愈來愈興玩螢光棒，五光十色，但地球先生就遭殃囉。有環保團體計過，全港四成家庭曾經丟棄螢光棒，每個家庭平均丟棄四十二支，一年就丟棄超過四千萬支，簡直係環保大災難。仲有呀，香港人出名眼闊肚窄，每年閒閒哋丟棄過百萬個月餅，簡直係暴殄天物。一個中秋節就睇穿社會百態，都咪話唔醜怪。
黃子華有首歌叫《做個文明中國人》，其實文明無疆界之分，內地人要文明，香港人更要文明，如果唔係，仲有咩資格自詡為國際大都市吖！