為何老朽眼中常含淚？因為老朽從沒想到香港有那麼多人「對港好有心」。一個不在其位之人突然高調讚揚其沙煲兄弟財爺「對港好有心」！當「ABC」火熱過一段日子後，個個都在估誰最有資格受北大人祝福做下屆特首；財爺盛傳兩度獲「習握手」，由此便被看漲。
然而「對港好有心」根本就非成為下任特首的條件；CY對港夠有心喇！之不過有心無力，「成熟一項推出一項」，最後卻是跪低一項！香港呢塊福地，連佢一張櫈、一支筆、一本簿都容不下，講真，若有自知之明便應放下、自在！種吓花，調理吓農務，下半世會快樂些。
你話財爺呢位「中產」對港有心，老朽只能苦笑。十年人事幾番新，可是，在年年估錯盈餘、年年庫房水浸下做財政預算，佢頂多係個稱職嘅中醫執藥師，呢個櫃抓一把，嗰個櫃執一些，加加減減一個預算案又大功告成，總之大家等住派糖，最多估吓公屋免租一個月或兩個月，綜援戶是否有雙糧諸如此類；最令老朽不忿的是不再有每月三百蚊的電費津貼，皆因香港夏天熱得淒涼，有幾多人好似環境局局長黃錦星咁，每個月只交百零蚊電費啊？老朽住上水村屋，夏天每月電費最少交千五蚊，家陣連電費津貼都冇，內心之糾結，實老朽之禿筆所難紓壓於萬一。
財爺不食人間煙火，咁多年來只做守財奴，一味靠嚇，遇到全民退保真正幫到長者時，就動輒搬出「結構性財赤」來嚇港人，守住金山銀山，乜都唔使做，佢對搞活香港經濟出過乜計？對港未來願景有乜貢獻？佢對港幾有心呢？路人皆見也。
真要治港，豈能心太軟！香港就是亡於議而不決，決而不行！你看反中亂港、佔中黑手仍在橫行，仍在鼓吹港獨，就知做特首要的是一顆硬淨有魄力嘅心，但依家我睇唔到囉！