政情：前綫首日封 議員得番梁耀忠
新一屆立法會選舉塵埃落定，有立法會議員尋日就喺facebook上載一個舊首日封，帶大家回到十九年前嘅光景。信封上有五個人嘅照片，當中四人唔係退下火線就係落敗，只有由直選轉戰俗稱「超區」嘅區議會（二）功能界別勝出嘅街工梁耀忠仍然留低，除令人感嘆時光飛逝外，亦見證咗十九年來民主派嘅變遷。
見證19年民主變遷
呢個係「前綫」嘅舊首日封，郵戳為憑，印上九七年六月三十日，即是回歸前夕。信封上面有五個人嘅照片，一邊係劉千石，另一邊係黃錢其濂，中間三人，其一係梁耀忠，另一個係「職工盟」李卓人，最中央就係劉慧卿。
呢幾個人都締造咗唔少第一，黃錢其濂係首名參選並成功當選立法局議員嘅前高官；劉千石則係因政府偏袒商界撤回《僱傭條例草案》憤而辭職嘅首名議員；梁耀忠因唔肯收回「臭罌出臭草」言論，成為首位被立法局主席趕出會議廳嘅議員；而劉慧卿則係帶領前綫加入民主黨、並成為該黨首名女主席。
時至今日，黃錢其濂現已專注教授英文，劉千石、劉慧卿亦先後退下火線，李卓人則喺新界西連任失敗，五人當中就只有梁耀忠繼續留喺議會。