政情：立會新丁救星 波叔頭痕
面對一班新立法會議員，班政府高官可謂有喜有悲，悲者莫過於發展局局長陳茂波（波叔），事關部分關注環保及地區發展嘅人士加入議會，肯定對政府開發土地及發展計劃添加阻力，睇嚟波叔都難以招架；相對地呢啲議員就有助推動環保，令環保政策容易過關，所以環境局局長黃錦星（星星）應該掩住半邊嘴笑喇！
政府推出發展計劃爭議好大，例如因興建高鐵香港段而要徵收菜園村、新界東北發展計劃，以至大嶼山發展概念計劃，議會內外都爭拗不絕，而保育人士更採取激烈抗爭行動。正如新當選新界西立法會議員朱凱廸，由菜園村開始，以至橫洲公屋發展計劃都同政府對着幹，入到議會肯定咬住波叔唔放，再加上反對政府拆除西環加多近街臨時公園擬建豪宅嘅民主黨香港島議員許智峯，預料政府將來要發展公園用地都好難過關。
勞工界剩溫和派 小肥張避火頭
咁都不特止，傳統功能界別建築、測量、都市規劃及園境界被攻陷，本土自決派嘅姚松炎爆冷擊敗謝偉銓，少咗呢個「朋友」幫手，但就多咗一個「對頭人」姚松炎對政府土地政策指指點點，波叔真係悲上加悲。可能波叔見勢色唔對，已安排喺今日約見朱凱廸同姚松炎，商討多項敏感議題。
不過，星星嘅形勢啱啱同波叔相反，唔單止多咗呢班同聲同氣嘅環保人士幫手，而一直反對擴建堆填區嘅西貢區議員方國珊（哪吒）喺新界東直選落敗，星星毋須喺議會同哪吒直接交手，肯定鬆一口氣。
至於勞工及福利局局長張建宗亦相對輕鬆，因為一直咬住佢唔放嘅工聯會陳婉嫻、王國興及鄧家彪都離開議會，剩低較溫和嘅黃國健、郭偉強及麥美娟，再加上勞工界兩個新議員仍係「學習」階段，相信可暫避火頭。
魔童未能當選 Greg蘇抹一額汗
此外，「做乜衰乜」嘅商務及經濟發展局局長蘇錦樑（Greg蘇）就抹一額汗，皆因「魔童」王維基未能當選，毋須喺議會被追究免費電視發牌一事，再加入再發免費電視牌照及俗稱「網絡廿三條」嘅《二○一四年版權（修訂）條例草案》都係留畀下屆政府處理，「唔做唔錯」自然唔使孭鑊喇！其實無論悲又好、喜又好，呢班官員捱埋剩低不足十個月任期就要卸任，能唔能夠留任下屆政府都係後話喇。