中環出更：吳永嘉劉國勳無懼入主立會凶房
新一屆立法會會期下月開始，各議員已經密鑼緊鼓處理搬入立法會大樓事宜。卓妮早前就率先報道，立法會大樓612及802號房都好似被落魔咒咁，入主議員唔係被「棄選」，就係唔能夠連任，搞到新丁議員都對呢兩間房避之則吉。
上手被勸退或連任失敗
據了解，兩個「膽生毛」議會新丁，包括候任區議會（第一）功能界別議員劉國勳及候任工業界（第二）議員吳永嘉（Jimmy）將會進駐兩間凶房，唔知佢哋有咩過人之處抵抗凶房魔咒呢？
政界之間一直流傳一個魔咒，立法會612及802號房嘅主人都無得連任，好似曾經使用612號房嘅民建聯（民記）前漁農界議員黃容根及香港島議員鍾樹根，都不約而同被勸退，認真邪爆！而另一凶房802號房，上一任主人前資訊科技界議員譚偉豪，以及現屆建築、測量、都市規劃及園境界議員謝偉銓都連任失敗。
據聞劉國勳同Jimmy決定唔理咁多，分別入主612及802號號房。有人分析，工業界（第二）議席一定係中華廠商聯合會所有，Jimmy能否連任，都係廠商會所主宰，無乜魔咒唔魔咒。至於劉國勳，佢今年只係得三十五歲，如果民記要以新舊交替理由換走佢都唔易，除非民記改例規定該屆別議員只能做一屆就要轉戰直選。
卓妮