政情：羅冠聰當選埋眾志仲未註冊
香港眾志（眾志）主席羅冠聰順利當選為新一屆立法會議員，但眾志嘅命運就冇羅冠聰咁順利喇，皆因眾志至今都未完成註冊，真係等到花兒也謝了。眾志尋日就發表聲明，批評公司註冊處拖延批核，做法係絕對不符合一般常規，又話有關問題對作為候任立法會議員嘅羅冠聰造成諸多不便喎，當選咗嘅口氣果然係唔同啲。
質疑公司註冊處拖延批核
羅冠聰同眾志秘書長黃之鋒早於今年三月已經向公司註冊處申請註冊「香港眾志有限公司（Demosisto Limited）」，但半年過去仍未獲批核。眾志發表聲明，話即使公司註冊處質疑自決等主張違反《基本法》，但佢哋都已解釋民主自決同前途公投並唔牴觸現行法律，質疑公司註冊處係無理拖延。
香港眾志就促請公司註冊處喺今個月十九日之前回覆會否批准註冊，否則佢哋就會視公司註冊處拒絕佢哋嘅申請兼作出進一步行動，包括提出司法覆核喎。