韓國嘅模特兒種類非常多，由青春活力到成熟女人味嘅都有齊，以滿足唔同嘅需要。不過講到集活力十足同輕熟魅力於一身嘅，就非姜伊娜莫屬，佢不論以賽車女郎身份示人，還是以時裝模特兒亮相，都畀到人視覺滿足。
嚟自南韓嘅姜伊娜，今年29歲，已經踏入輕熟女之齡，但係外表睇落一啲都唔似。可能有人認為佢能夠保持凍齡效果，全靠化妝啫，咁講就大錯特錯喇，事關阿妹佢相當注重飲食同勤做運動，生活有規律，因此保養得宜，個樣睇落似20出頭。現時作為一位職業模特兒嘅伊娜，喺任何一個場合上都見到佢嘅身影，從賽車場到電玩展，以至潮流雜誌都會發現佢嘅蹤迹。不過大家又知唔知佢最初係以乜嘢身份出道呢？答案就係車模。多年前佢以車模身份喺大型車展中登場，一襲低胸連身裙、優雅嘅氣質加上迷人嘅身段，成為全場焦點，其後佢被車廠睇中邀請客串賽車女郎，自此之後，佢成為賽車場上嘅常客。不過由於賽車女郎嘅工作相當辛苦，故此近年佢重回車展嘅展場，先後喺多個汽車沙龍、新車發布會、電單車車展等亮相。
對於工作抱有相當熱忱嘅佢，又點止喺車展中散發魅力呢？上年佢就擔任網絡直播節目主持，起初佢擔心自己唔夠人氣，吸引唔到網民支持，結果係出乎意料之外，自直播開始後，支持佢嘅粉絲有增冇減，更有粉絲話等咗呢個機會好耐，終於可以同女神溝通。原來阿妹過往喺車展及賽車場上嘅照片，早已喺網上流傳，並且深得網民愛戴。得到大家嘅支持後，佢主持嘅表現愈嚟愈好，口才愈嚟愈掂，愛以自嘲同搞笑方式討粉絲歡心，經常帶畀大家歡樂，有唔少粉絲話以前睇佢嘅照片時，只係知道女神形象百變，化身成活力賽車女郎又得，變成迷人熟女亦得，估唔到原來佢嘅性格咁可愛，難怪阿妹喺網上爆紅啦！雖然佢喺網絡上取得成功，但問到佢最愛邊種工作時，佢仍覺得模特兒最適合，佢笑稱做直播節目時總係唔知擺乜嘢姿勢好，而喺展台上佢卻可以輕鬆又自然咁擺甫士，展現出個人魅力，睇嚟阿妹都係注定食模特兒呢行飯。
簡介：姜伊娜唔單止樣貌同身材都咁正，言談亦風趣過人。不過有個地方大家亦值得留意，就係佢最愛轉換髮型，有時長髮，有時短髮，佢表示長髮予人優雅感覺，而短髮則很有個性，唔知大家又點睇呢？
出生地：南韓
身 高：172cm
三 圍：34、24、35
撰文：魂