政情：田北辰突表態競逐立會主席
建制派早前盛傳內務委員會主席梁君彥、獨立建制派謝偉俊等人有意角逐新一屆立法會主席，近日基本已協調梁君彥任大會主席，但政治一日都嫌長，喺新界西直選取得逾七萬票當選、新民黨常務副主席田北辰接受傳媒訪問時自爆，打算競逐立法會主席一職，究竟佢突然殺入戰團所為何事，認真耐人尋味。
現年六十六歲嘅田北辰於四年前首度循新界西直選當選，並於剛過去換屆選舉成功連任，尋日喺事前無先兆下突然表態打算競逐立法會主席一職。有接近田北辰的消息指，田眼見兄長田北俊於七十歲退休，加上自己是建制派直選票王，所以想趁機一試身手。
田北辰回應話，佢唔會撕裂建制派，但如果有人支持就會參選。不過，佢話梁君彥喺功能組別自動當選不及直選有認受性，至於謝偉俊則比較近西環，認為公眾希望主席有認受性喎。
疑為連任人大代表鋪路
有政界中人分析，田北辰忽然希望更上一層樓，似乎另有所求，有人更估計佢身為港區人大代表，此舉或與明年底人大換屆選舉有關，旨在為連任人大鋪路。事關田二少過去較為出位敢言，惹來部分親中人士不滿要求換人。