政情：楊岳橋做黨魁隨時被老鬼玩殘

同一議題 黨員取態各異

由於梁家傑一早宣布不再連任，外間一直對於黨魁交棒人選有多番推測，唔少意見都認為AY及今屆重返議會嘅陳淑莊係大熱人選。綜合各方消息，該黨已經決定由AY接任黨魁一職，並安排他與其他泛民黨派，以及建制派代表討論事務委員會正、副主席嘅安排。AY接受查詢時並無否認接任黨魁一事，只稱要經過黨內程序，經執委會及會員大會拍板後先可以對外公布。同一時間，另一大熱陳淑莊就飛去阿根廷旅行，未知係咪同失落黨魁有關係呢？

雖然黨魁人選已經呼之欲出，但並唔代表一切都會順利協調。眾所周知，公文袋「六個議員，六個意見」，不時出現同一議題有人贊成、反對及棄權，要擔當黨友之間嘅溝通橋樑已經不容易，要令六人有一致立場就難上加難。好似之前政府提出改革醫務委員會嘅《醫生註冊（修訂）條例草案》，該黨在二讀投票時取態各異，AY、梁家傑、郭榮鏗、陳家洛四人投贊成票，但郭家麒投棄權票，而毛孟靜就投反對票，被批無黨格兼無黨紀，搞到AY要為大家解畫。

入議會不足一年經驗淺

該黨投票不一致情況，估計未來四年會經常出現，AY當上黨魁後就更加名正言順要出來解畫及交代喇。其實AY喺年初新界東補選之後先進入立法會，議會經驗不足一年，相比其他黨友難免會令人覺得未夠班，未知為人圓滑嘅AY能唔能夠控制一班「老鬼」呢？最終會否被玩殘呢？