大家知唔知有種病叫prosopagnosia？呢種病中文係「臉盲症」，顧名思義，患者經常認錯人，即使朝見口晚見面都可能搞錯。有理由相信綽號「唔得掂」嘅教育局局長吳克儉係重度患者，睇嚟係時候辭職醫醫佢嘞！
呢，立法會選舉結束足足一個星期，吳得掂終於醒起要寫信祝賀新科議員，點知唔寫猶自可，一寫當堂鬧笑話。佢寫畀梁耀忠嘅信，劈頭第一句居然係「祝賀你於二○一六年立法會換屆選舉中的教育界功能界別成功連任，延續服務市民的使命。」唔係啩，明明教育界立法會議員係葉建源，而梁耀忠就係從「超區」當選，稍為留意吓新聞都唔會搞錯。再講，兩位都唔係新丁，特別係葉建源，照計呢幾年吳得掂應該成日交手，咁都可以張冠李戴，你話佢係有病吖，抑或個心飛咗去「好靚好靚」嘅日本制服學生妺嗰度呢？
吳得掂堂堂一個問責局長，居然連最基本嘅選舉制度，甚至自己嘅對口議員都矇查查，簡直荒天下之大謬，唔怪得當事人都忍唔住寸爆佢，話自己雖然任職教師多年，亦好關心教育事務，樂意同政府討論教育政策，但無意取代葉建源咁話。
教育局又點解畫呢？佢哋話喎，局長衷心祝賀梁耀忠連任，對於信中嘅手民之誤，局長會向梁議員致歉，又話會再次致函祝賀喎。計功夫茶話齋，手民之誤就假嘅，吳得掂唔熟書至真。好似之前全港性系統評估（TSA）搞到怨聲載道咁吖，吳得掂係威係勢，話會成立委員會全面檢討，點知原來相關委員會一年多前已經成立，你話佢係咪發緊夢吖！
所以話，「唔得掂」呢個朵確係實至名歸。大家有眼見，佢上台咁耐賴嘢咁耐，由國教跪低到TSA風波再到港獨思潮入侵校園，唔係匿喺女上司後面做裙腳仔，就係竄咗去外國風流快活，關人個關，結果咪搞到鑊鑊新鮮鑊鑊甘囉。
冇符喇，現屆政府管治班子拉雜成軍，正所謂「雞鳴狗盜出其門，士所以不至也」，睇吓吳得掂，再睇吓其他局長，冇幾個似番個人樣嘅，莫講話市民鬧爆，連「好打得」嗰個都插今屆管治班子係「雜牌軍」。你話嘞，咁多未夠班嘅人癡癡呆呆，坐埋一枱，施政又點會唔甩甩漏漏，授人以柄，香港又點會唔七國咁亂吖。
「濫竽充數」嘅成語故事大家一定耳熟能詳。南郭先生竽藝固然水皮，但都要齊宣王昏庸唔識貨至可以蒙混過關。兵熊熊一個，將熊熊一窩，與其炒晒班夥計，不如先炒咗個老闆好過！