大文豪蘇東坡說：「大凡為文，當使氣象崢嶸，五色絢爛。漸老漸熟，乃造平淡。」這是內行人語，文章要平淡而有味，那要真材實學，一如不賣花巧的菜式，離不開材料正，加上廚師功夫到家，好像四川菜裏的「開水白菜」，湯清無甚睇頭，可並非開水煮的白菜，用的是老雞熬的湯。
今日並非老朽教煮餸，只是有感於某立法會選舉候選人哭訴在深圳某酒店黑房被三名內地官員威逼退選，淒涼過黃毛丫頭被父母教訓不准跟屋邨嘅欄杆少年談戀愛，跟住佢就匆匆提着行李避走英國。呢場戲，老朽認為演技過火，皆因一個人若然「過度受嚇」，唔應該再咁高調出嚟說三道四。一個人雖然讀得書多，卻未必讀得通，甚至有可能讀到壞腦兼有妄想症。其實，一個人驚青成咁，好應該做一棵溫室植物而不應出來從政，也許亦可以自娛寫吓無厘頭小說。
此人也實在太抬舉自己，說甚麼「有超越中聯辦層次的內地人士」向他施壓，阿哥，你乜水啊？對於一個幾乎沒有當選機會的候選人，使唔使動用到國務委員或政協副主席級別向佢施壓？你話唔係妄想又係乜呢？唉！香港竟然由「示威之都」變成「暗殺之城」，這個福地，畀呢啲演技過火嘅人搞到好似進入迷離境界，一個二個都話要保護，睇怕香港未來會落黑雨！而警方如果不加緊培訓便衣警察，他日京官到訪，老朽相信佢哋一定會帶來中南海保鏢。
香港事務，愈來愈撲朔迷離，老友傳給我一則極短篇，頗有啟發：二哥要出國旅遊，讓三哥幫忙看家，臨走前特別交代：「藏獒隨便逗，但別惹鸚鵡！」之後三哥怎麼逗弄藏獒都冇事，他心想：「藏獒都如此，這鸚鵡也是一隻破鳥，能把我怎樣？」於是逗鸚鵡玩，結果鸚鵡開口說話：「咬他！」三哥，享年三十八歲。許多人其實是死於鸚鵡而非藏獒。