立法會候任議員朱凱廸前日透露特首梁振英（CY）打電話畀佢，但當聽到佢講官商鄉黑勾結時，CY即刻收線，特首辦冇回應點解CY會收線，但朱凱廸嘅言論隨即引起鄉事派不滿，仲隔空駁火添！十八鄉鄉事委員會主席梁福元尋日批評朱凱迪譁眾取竉，製造白色恐怖，指官商鄉黑唔係勾結，而係合作。跟住喺警署落緊口供嘅朱凱廸又忍唔住走出嚟反駁，直指「無人會同意官商鄉黑勾結或合作」。依家除咗梁福元之外，亦有啲鄉紳幫腔鬧朱凱廸抹黑鄉議局，大家駁嚟駁去，睇怕呢場交仲有排嗌！
