政情：民記用完即棄 「根」本唔係元老
民建聯（民記）尋日開記者會總結選舉，但就完全見唔到任何新當選議員，包括柯創盛、張國鈞、周浩鼎、劉國勳，出席嘅只有舊人李慧琼（Starry）、蔣麗芸（Ann）、陳恒鑌（Ben）、葛珮帆同黃定光等連任議員。
李慧琼失言兜唔到
黨主席Starry總結選舉時講到，今次選舉該黨冇前輩排喺名單之內，當時都擔心會否影響吸票，但最後大家都認為要勇敢承擔責任，所以名單冇現任議員谷票，最終都能夠完成交棒。被問到香港島名單排第二嘅鍾樹根唔係現任議員唔算係前輩或元老嗎？係咪計漏咗呢？
Starry連忙話「冇計漏佢（樹根），佢一路喺我哋團隊當中」，Ann亦幫口「佢未係元老」，Starry亦認同話「佢未係元老嚟o架」。此時，Ben亦連忙救駕指「佢諗住競選連任o架」，Starry亦即時話「冇錯」。Starry其後又話，感謝團隊成員，包括樹根，又話樹根非常值得尊敬。唔使兜喇，估唔到樹根一選完就用完即棄，做黨友做到咁真係冇義氣啦！