政情：白鴿無「商」 志偉頂硬上
立法會選舉塵埃落定，民主黨（白鴿黨）由六席增至七席，重奪泛民主派第一大黨地位，然而該黨的新組合卻存在先天性缺陷，最棘手是無論新丁舊將都沒有工商、金融及財經方面的經驗，在分工上出現極大缺口，而在蜀中無大將之下，臨時拉夫出動只在早年讀過經濟的胡志偉頂上。咁就大煲嘞，事關拋低書包二十幾年，就算未送番晒畀老師，都脫晒節啦，睇怕胡志偉要一輪惡補先可以上手！
現屆立法會，白鴿黨是由主席劉慧卿（卿姐）、何俊仁（AV仁）及單仲偕分擔財經範疇，卿姐入咗工商事務委員會、AV仁就加入經濟事務委員會，而單仲偕更加做「膽」，包攬工商、經濟及財經等三個事務委員會，點知三人同時退下火線，搞到「後繼無人」。
據聞該黨對於點樣補位都好頭痕，事關新丁、舊將都唔熟呢瓣。以新丁為例，接咗卿姐棒嘅林卓廷本身做過廉政公署調查員，屬意跟保安；有「峯鴿」之稱嘅許智峯係城市大學榮譽法律學士，佢想跟番AV仁負責嘅司法同法律；該黨副主席尹兆堅係社工，較熟悉社福、交通及房屋等範疇，而身兼元朗區議員嘅鄺俊宇就搞過保護南生圍及關注泥頭山等問題，較傾向處理環境及環保等政策。
新丁優先揀專責範疇
至於舊將方面，最資深嘅議員涂謹申（阿涂）只係入咗財經事務委員會，而胡志偉就入咗經濟事務委員會，理工大學教通識嘅黃碧雲（一舊雲）直情冇掂呢瓣，可見呢三個舊將都唔全面。咁點算呢？據聞黨內屬意畀新丁揀晒跟乜嘢範疇先，而剩低嘅就由三個舊將包攬晒，但阿涂一向唔多掂財經嘢，而一舊雲更加冇掂過，剩低嘅就只得胡志偉，喺揀無可揀下，有人摷番胡志偉早年曾經讀過經濟，諗住搵佢頂硬上。
胡僅廿幾年前讀經濟
胡志偉係美國威斯康辛大學經濟學碩士，秤起上嚟，當然比阿涂同一舊雲合適，但都已經係二十幾年前嘅事，拋低書包咁耐，睇怕乜都唔記得晒啦，要佢頂晒三個範疇嘅話，就算佢變足球小將戴志偉都攻唔掂呀！