中環出更:商界管理心得 成就感換歸屬感

有調查指新一代打工打唔長,到底一間公司咁多同事,點管理先最有效?香港管理專業協會(管協)日前舉辦講座暨頒獎禮,多名商界管理層異口同聲話要畀員工滿足感才有歸屬感,甚至要提供旅遊獎勵添!身兼管協理事會委員嘅香港總商會前主席彭耀佳話,新一代打工仔最重視工作滿足感,如果意見冇人理,發揮唔到所長,好快就會轉工,所以令員工感到受重用及清楚晉升前景好重要。

管協副主席利子厚都話,要令新一代有成就感好重要,特別係同事嘅意見,好多時即使佢未必認同,都要聆聽唔同專業範疇領域嘅同事意見。

虛心聆聽同事意見

不過,講易做難,佢舉例有次與同事討論管理商場策略,笑言自己屬於上一代,心內梗係覺得日本貨最受歡迎,但市場策劃嘅同事就話依家韓國貨仲受年輕人青睞,雖然佢最初未必認同,但理性話畀佢聽對方嘅資訊先係最新,而事實同市場反應證明,同事講嘅嘢係啱嘅。

同場仲有得獎機構港協暨奧委會名譽副會長許晉奎、副會長霍啟剛、前滑浪風帆運動員黃德森及管協主題年工作小組成員曾耀民。任職汽車公司高層嘅曾耀民話,新一代員工着重工作生活平衡,獎勵旅遊對於員工非常有激勵性,尤其與銷售掛鈎嘅行業。啟剛同許晉奎就話,港協暨奧委會有同港鐵合作,栽培退役運動員投入職場,黃德森就指好多運動員經培訓後均於交際及語言技巧上有所改進,出路大大擴闊。

卓妮

第一手消息請下載on.cc東網iPhone/iPad/Android/Windows Phone Apps