政情：公民講場：Greg蘇怕再見鬼 版權例埋地底

由於泛民無休止咁拉布，搞到立法會多次流會都表決唔到《2014版權（修訂）條例草案》，商務及經濟發展局局長蘇錦樑（Greg）喺三月初宣布就此「作罷」。Greg蘇尋日喺秘魯返港，即刻被追問會唔會喺新一屆立法會重推草案，佢重申今屆政府唔會推出更新版本嘅草案，但認為條例需要與時並進，亦唔會低估修訂嘅困難，希望先多聽各方意見再作研究。話時話，新一屆多咗七個主張本土自決嘅人士加入議會，仲講到明會拉布甚或衝上主席台，重推草案都係送死，Greg蘇梗係戴定頭盔，講明「埋葬」咗條草案嘞，加上佢下屆都未必可以留低，剩番嗰十個月任期就更加唔想上身喇！