政情：蔡宗富趕潮流 謀推輕智能錶
智能手錶當道，令傳統腕錶品牌喺淡市下更加難做，由於智能錶嘅技術同傳統製錶工藝係兩回事，所以多數傳統錶廠都唔敢亂咁越雷池半步。身兼香港鐘表業總會秘書長嘅瑞士雷米格董事總經理蔡宗富（Daniel）就密謀推出「輕智能」手錶，預計明年問世，希望趕上智能化潮流。
Daniel話香港鐘錶零售業持續淡靜，業界惟有各出奇謀應變，但係講到做智能錶就要好小心，佢想做嘅所謂「輕智能」手錶，只係簡單計算步數同卡路里，如果想測埋心跳又係另一種技術。咁複雜，難怪業界唔敢亂嚟喇！
展位借朋友跑車吸睛
至於傳統腕錶市場始終都係玩設計。Daniel最近就推出一款運動型腕錶，錶面同底都有汽車嘅輪圈，視線亦可穿透。為咗喺香港鐘表展期間吸引買家，佢特登同朋友借架紅色跑車放喺展位，結果「吸睛」效果又真係唔錯喎。